Isa ka daku nga hangkat sa isa ka institusyon kung paano sini mapalambo, mapadayon kag mapahimusog ang iya gin-tukod nga pundasyon. Pundasyon nga kung sa diin gin pamaayo kag padayon nga gina-pabaskog bangud sang dako nga paghandom nga makahatag sang maayo, kalidad kag dependable nga serbisyo para sa katawhan sa probinsya sang South Cotabato.
Ang South Cotabato I Electric Cooperative, Inc. (SOCOTECO-I) sa sulod sang sobra apat (4) ka dekada, naghatag sang matuod-tuod kag tampad nga serbisyo sa iya nga mga myembro-konsumedor. Ini nga mga serbisyo naghatag kag nagbunga sang mga nanuhay-tuhay nga mga pagbag-o kag paglambo sa probinsya sang South Cotabato. Ang SOCOTECO-I wala naga untat sa paghimo sang mga mapinuslanon nga mga butang agud mapadayon nga mapanami ang paghatag serbisyo paagi sa mga innovations and ventures nga kung sa diin mapamaayo pagid ang pagdistribute sang kuryente sa tagsa-tagsa ka mga panimalay kag establisimyento sa probinsya.
Ang kooperatiba naga padayon sa pagpangita sang mga dugang nga power source para mapadayon ang reliable nga pagdistribute sang kuryente. Sa subong, bugal ko nga ginapabalo nga ang SOCOTECO-I ang isa sa mga Electric Cooperatives (ECs) nga kung sa diin nagagamit sang economic friendly power source pamaagi sa solar powerplant sa banwa sang Surallah nga kung sa diin nahiwat ang opening ceremony sang January 21, 2016. Isa man sa mga dugang nga power source ang Bunkerfired Power Plant nga yara sa Brgy. Paraiso, City of Koronadal. Sa bahin naman sang Sitio Electrification Program (SEP), ang distribution lines sang Ned Lake Sebu kag Upper Sepaka, Surallah nasugdan na sa pag-construct sang bulan sang Marso. Ini lang nagapabalo nga padayon ang pag-expand sang sini nga proyekto agud nga mapasug-an ang mga lugar nga naga panginahanglan sang kuryente.
Daku gid ang akon nga pagpasalamat sa aton halangdun nga Presidente Benigno Simeon Aquino III sa pag hatag niya sang daku nga pondo para sa SEP nga kung sa diin paagi man sa tampad nga panerbisyo kag dedikasyon sang SOCOTECO-I nakaangkon sang parehas nga oportunidad ang mga katawhan sang South Cotabato nga mapasug-an ang mga nanuhay-tuhay nga mga Sitio nga sakop sang South Cotabato. Nagapasalamat man ako sa aton halangdon nga Congressman Ferdinand Hernandez kag Governor Daisy Avance-Fuentes sa ila nga gin hatag nga mga suporta para marealize ang SEP nga kung sa diin sang una ginahambal nga imposible gid pero karon sa amat-amat ang ini nga mga lugar maabot na sang elektripikasyon.